మనం ఎవరికి బోధిస్తున్నామో వాళ్ల స్థాయికి దిగి చెబితేగాని అది వారికి అర్ధం కాదు అనేది నా భావన . చిన్న పిల్లలకు చెప్పేటప్పుడు వాళ్ల స్థాయిలోనే చెప్పాలి . ఏదో బెదిరించి , భయ పెట్టో చెప్పడం వలన వాళ్ళు అంతగా ఆసక్తి చూపించలేరు అంటూ, గత 22 సంవత్సరాలుగా శిక్షణ ఇస్తున్న’ శర్మ ఉషారాణి ‘ గారితో ఈ నెల నర్తన కేళి ముఖాముఖి ….
*మీ పూర్తి పేరు ? తల్లి దండ్రులు ?
శర్మ ఉషా రాణి . మా అమ్మ పేరు రాజ్య లక్ష్మి , నాన్న పేరు శ్రీనివాసన్ .
*మీ స్వస్థలం ?
మా స్వస్థలం కడప . నేను పుట్టింది తంజావూరు లో , కాని పెరిగింది , చదివింది హైదరాబాద్ .
*మీ నాట్యం పై ఆసక్తి కలగడానికి కారణం ?
మా అమ్మ రాజ్య లక్ష్మి భరత నాట్య కళాకారిణి . ఆమె అప్పట్లోనే సింగపూర్ , మలేషియా వంటి దేశాలలో ప్రదర్శనలు ఇచ్చారు .
*మీ తొలి గురువు ఎవరు ?
మా అమ్మ నా తొలి గురువు . తరవాత పసుమర్తి శేషుబాబు గారి వద్ద కూచిపూడి సుమారు 15 సంవత్సరాలు శిష్యరికం చేసాను .
*మీ తొలి ప్రదర్శన గురించి ?
నా చిన్నప్పుడే కడప లో చేసాను . కూచిపూడి లో అయితే హైదరాబాద్ రవీంద్ర భారతిలో చేసాను .
*మీరు మొత్తం ఎన్ని ప్రదర్శనలు ఇచ్చారు ?
సుమారుగా 1000 ప్రదర్శనలు వరకూ ఇచ్చి ఉంటాను . శిల్పా రామం , త్యాగరాయ గాన సభ , రవీంద్ర భారతి , సికింద్రాబాద్ వినాయగుడి , అష్టలక్ష్మి గుడి , ఒంటి మిట్టలో ని కోదండ రాముని దేవస్థానం లోను , ఇవే కాకుండా మద్రాస్ , సిక్కిం , బీహార్ , ముంబాయి , తిరుపతి , బెంగుళూర్ , ఉత్తరప్రదేశ్ , కలకత్తా ఇలా చాలా చోట్ల చేసానమ్మ .
*విదేశాలలో ఇచ్చిన ప్రదర్శనలో మీకు గుర్తున్న ప్రదర్శన ఏమిటి ?
విదేశాలలో అంటే 2006 లో అమెరికా లో మూడు నెలల పర్యటించి ఇచ్చిన ప్రదర్శనలకు మంచి పేరు వచ్చింది .
*మీరు నాట్యం లో పి . హెచ్ డి చేసారు కదా ? ఏ విశ్వవిద్యాలయం నుండి చేసారు ?
అవునమ్మా . తెలుగు విశ్వవిద్యాలయం నుండి చేసాను .
*పి . హెచ్ డి(phd) లో మీరు ఎంచుకున్న అంశం ? ఎవరి పర్యవేక్షణలో చేసారు ?
ఉమా రామారావు గారి పర్యవేక్షణలో యక్షగానం , కూచిపూడి భాగవతాలు మీద పరిశీలన చేసాను .
*మీరు అందుకున్న పురస్కారాలు ?
నాట్య మయూరి , అభినయ నేత్రి , అమెరికా పర్యటనలో నాట్య చూడామణి , న్యూయార్క్ లో నాట్య వేద విశారద ,విశాఖ పట్నం వారి నుండి వనితా పురస్కార్ , హైదరాబాద్ వారిచే విశిష్ట మహిళా పురస్కారం ,ఈటా వారి నుంచి ఉత్తమ నృత్య కళాకారిణి ,తాళ్ళ పాక దేవస్థానం వారు నాట్య చూడామణి , తిరుపతి లో కళా ప్రపూర్ణ పురస్కారాలు అందుకున్నాను .
*మీ రూపొందించిన నృత్య రూపకాలు గురించి చెప్పండి ?
గీత గోవిందం , శభాజ గోవిందం , శ్రీ మద్ భగవద్గీత , శ్రీ సిద్ది వినాయక విజయం , శ్రీ శరణ్ నవ దేవి మహాత్త్యం , గోదా లక్ష్మి , అన్నపూర్ణ దేవి మహాత్త్యం , సాయి చేసిన నృత్య రూపకాలుచేసాను . తిరుమల తిరుపతి భక్తి చానల్ కోసం నృత్య సంకీర్తనపేరుతో ఒక కార్యక్రమం చేసాను .
*మీరు గురువుగా ఎన్ని సంవత్సరాలు నుండి శిక్షణ ఇస్తున్నారు ?
22సంవత్సరాల నుండి శిక్షణ ఇస్తున్నాను . ముందు హైదరాబాద్ భారతీయ విద్యా భవన్ లో చేసేదానిని , ప్రస్తుతం తిరుపతిలో ని నృత్య కళాశాలలో గత ఎనిమిది సంవత్సరాలుగా గురువుగా శిక్షణ ఇస్తున్నాను .
*కాలేజి లోనే కాకుండా మీరు ఇంటి వద్ద కుడా పిల్లలకి శిక్షణ ఇస్తారా?
ప్రస్తుతం ఇస్తున్నాను . నాకు చిన్న పిల్లలకి చెప్పడం అంటే చాలా ఇష్టం . 3 సంవత్సరాల వయసున్న పిల్లలకి ఇంటి వద్దనే శిక్షణ ఇస్తున్నాను . పెద్దవాళ్లు వస్తున్నారు .
* కాలేజి లో మీరుకూచిపూడి మాత్రమే బోధిస్తారా
అవునండి . నృత్య శిక్షణ అయితే కూచిపూడి మాత్రమే బోధిస్తాను . వాళ్లకి కావాల్సిన నోట్స్ కూడా నేనే తాయారు చేసి ఇస్తాను . అలాగే భరత నాట్యానికి థీయరీ (నోట్స్)చెబుతాను .
* పిల్లలకి మీరిచ్చే శిక్షణ ఏ విధంగా ఉంటుంది ?
ఒక విషయం చెప్పాలి మనం ఎవరికి బోధిస్తున్నామో వాళ్ల స్థాయికి దిగి చెబితేగాని అది వారికి అర్ధం కాదు అనేది నా భావన . చిన్న పిల్లలకు చెప్పేటప్పుడు వాళ్ల స్థాయిలోనే చెప్పాలి . ఏదో బెదిరించి , భయ పెట్టో చెప్పడం వలన వాళ్ళు అంతగా ఆసక్తి చూపించలేరు .
*ప్రస్తుత కాలంలో మిగతా వాటితో పోలిస్తే నాట్య ప్రదర్శన ల అంతగా ఆకట్టుకొక పోవడానికి కారణం ?
వేటికి ఉండే ఆదరణ వాటికి ఉండి . నాట్యం మన సంప్రదాయ కళఎప్పుడు మనం కూడా పాత విషయాలనే కాకుండా సాంఘికమైన విషయాలకు ప్రాధాన్యం ఇస్తే మరింత ఆదరణ లభిస్తుంది .
* నాట్యం నేర్చుకుంటున్న వారికి మీరిచ్చే సలహా ?
నేర్చుకున్న దానిని తప్పకుండా సాధన చేయాలి . దానికి మరి కొన్ని మెరుగులు దిద్దితే కాని అభ్యసించిన దానికి అర్ధం ఉండదు .
– అరసి
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~