వర్షాన్ని పడనీ!!!

గాలి చొరని తలగడలో వాటిని నింపి,
నా ఆకాశంపైకి వాటిని పంపు…
ఆ అందమైన నల్లటి మేఘాలను!
పాతదైపోయిన జీవితాన్ని మళ్ళీ క్రొత్తదిగా చేద్దాం
విడిచిపోయిన హరితాన్ని మళ్ళీ ఆహ్వానిద్దాం
పూల జల్లోలే కురిసే చిరుజల్లుల పవిత్రతలో
మన రాగద్వేషాలన్నింటినీ కరిగించేద్దాం
వర్షాన్ని పడనీ!!!
మరిగిన ఈ ఆవేశపు ఉష్ణాన్నిచల్లబడిపోనీ
తలవంచి నిల్చిన భావాలు…కనులెత్తి శిఖరాలను చూడనీ
రక్తసిక్తమైన మనఃగాయాలు ఇప్పుడైనా మానిపోనీ
చిరు మువ్వల ఆకులు తొడిగిన చిన్నారి మొక్కలు…తడిసి, మురిసి ఆడనీ
తలదిండులోకి కొద్ది కొద్దిగా గాలిని చొరబడనీ…
కొంటెగా కవ్విస్తూ గిలిగింతలు పెట్టనీ…
మేఘం గాలితో సంగమించగా…చిరుజల్లులు పుట్టనీ
అవనిని పునీతం చేస్తూ ముత్యాలపోతగా…నిండుగా కురవనీ..
మౌనం రాజ్యమేలు గొంతులు ఇపుడు ఎలుగెత్తి పాడనీ
మేలిముసుగు తొలగించి, అనుభూతులు మందహాసం చేయనీ
వర్షాన్ని పడనీ!!!

నిశీధిని కప్పుకున్న చూపుల్లోకి వెలుగులు నిండనీ
చెప్పులు విడిచిన కాళ్ళు బురదలో తమ గాంభీర్యాన్ని కడగనీ
చిన్నారుల చిలిపితనాన్ని ఒంటినిండా పేర్చుకుని చిట్టి కప్పలవలే గెంతనీ
మనసుల కలయికతో…దూరాలు చేరువ కానీ
ప్రేమికులు మనసు విప్పి ప్రేమను తెలియపర్చనీ
మగువల ముంగురుల నుండి చినుకులను బిందువులుగా రాలనీ
ప్రియుల మనసులను అవి ముప్పుతిప్పలు పెట్టనీ
విత్తుల్లో నిదురించే పచ్చదనాన్ని ప్రేరేపించనీ
అవనిని ముద్దగా తడిపి ముద్దాడనీ
మంత్రించిన అనుభూతులు స్వప్న జగత్తు ద్వారాలు మరలా తెరవనీ
వర్షాన్ని పడనీ!!!

సంకోచపు వస్త్రాలను వదిలి…
మంత్రముగ్ధనై మైమరచి…
తన్మయత్వాన్ని దోసిళ్ళనిండా నింపుకుని…
నన్ను ఈ దివి ధారలో పూర్తిగా తడవనీ
వర్షాన్ని పడనీ!!!

– విజయ భాను కోటే

Let it rain

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~