వాస్తవానికక్కడ ఏదీ ఉండదు
నీ ప్రశ్నకు నా జవాబులా
కొన్ని మాటల యుద్దాలు తప్ప…
నిజానికేదీ శాశ్వతం కాదు
జరిగిపోయిందనుకున్న కాలానికి
జరగాల్సిన పనేదో మిగిలుండటం తప్ప
కాలపు సునామీలో ఎన్ని అనుభవాలు
శిథిలమయ్యాయో
ఏ హృదయానికి గుర్తుంటుంది చెప్పు
నిన్నల్లా మిగిలే రేపుల్లో
ఎన్ని కలలు కల్లలుగా మిగలక
నిలుస్తాయో
ఆ గుట్టు ఎవరు విప్పు
నీకోసం ఆగని ఏ జీవినీ నువ్వు శాసించలేవు
నీకై నువ్వే ఓనాటికి బూడిదగా మిగులుతావు కనుక
నీదారికి రాని ఏ మార్గాన్నీ నువ్వు స్థాపించలేవు
నీ ఎద లోతుల్లోని ముళ్ళూ పూలూ నీకే అంతుచిక్కవు కనుక…
ఊహించినదేదీ నీకై రాసి పెట్టిలేదు
నిన్ను చేరుకున్నదేదీ నిన్నటి నీ ఆలోచనల్లో
అంకురమైనా కాదు
ఇదేగా శాశ్వతం
ఎన్నటికీ మార్చలేని జీవితం….
-సుధామురళి
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~