నందిని బస్సు దిగి టైము అవడంతో సరాసరి ఆఫీసుకు వెళ్ళిపోయింది. సాయంత్రం రాగానే కాఫీ కలుపుదామని చూసేసరికి, కాఫీ పొడి తరిగి పోయినట్లు కనిపించింది. అక్కడే ఉన్న సుధీర్,”మా అమ్మా నాన్నా వచ్చి రెండ్రోజులు వుండి వెళ్ళారు” చెప్పాడు.
“సో, మీరు ఆ రెండు రోజుల సరిపడా మన వుమ్మడి ఖర్చులో ఎక్కువ భరించుకోవాల్సి వుంటుంది.”
“సరే, అలాగే” అన్నాడు సుధీర్.
ఆమె తన అమ్మా నాన్న ఏమన్నారని కానీ, వాళ్ళ గురించి వివరాలు కానీ అడుగుతుందేమోనని చూశాడు. నందిని మరేం మాట్లాడకుండా తన గది లోకి వెళ్ళిపోయింది. స్నానం చేసి వచ్చాక వంట ప్రయత్నాలు మొదలు పెట్టింది.
“ఈ వారం నా వంతు కదా, నేను చేస్తాను. ఏ కూర వండమంటారో చెబితే చేసేస్తాను” అన్నాడు సుధీర్.
చాకుతో క్యాబేజీ తరుగుతూ,”నేనుండగా మీ అమ్మ గారు వచ్చినట్లుంటే, మీకసలు వంటే రాదనీ, వచ్చని అబద్ధం మాత్రం చెప్పారని చెప్పేదాన్ని. అసలు వంట ఎందుకు నేర్పలేదో అడిగేదాన్ని.”
“ఏదో క్యాబేజీ మీ అంత సన్నగా తరగడం నాకు చేతకాక పోవచ్చు, అంత మాత్రాన అసలు వంట రాదనడం బాగాలేదు. అయినా నలుడూ, భీముడూ మగ వాళ్ళే కదా?” వివరణ ఇచ్చుకున్నాడు.
“అందరు మగాళ్ళు అలాగే అంటారు లెండి. ఆడ వాళ్ళు వంట చెయ్యడంలో మనసు పెట్టి చేస్తారు. మగవాళ్ళకు అలా చెయ్యరు. పోనీ మీరు భీముడిలా లేరు, నలుడిలానూ లేరు కదా! మరి మీ స్పెషాలిటి ఏమిటో?” చిలిపిగా నవ్వుతూ అడిగింది నందిని.
“మీతో కలిసి ఇలా ఉండడమే” ఇలా అని నొక్కి పలుకుతూ అన్నాడు సుధీర్.
నందిని అతని మాట అర్ధం అయినట్లు నవ్వేసింది.
“మా అమ్మా నాన్నా మిమ్మల్ని గురించి అడిగారు” భోజనాల దగ్గర చెప్పాడు.
“ఇంకా చెప్పరేమిటని ఇందాకటి నుంచి అనుకుంటున్నాను” నవ్వింది.
“మీరు అడగుతారేమోనని చూశాను.”
[spacer height=”20px”]
“ఇది మీకు సంబంధించిన విషయం, మీ వాళ్ళు ఏమన్నది మీరు చెప్పాలి. అయినా ఏముంటుంది? మామూలుగానే మన ఇళ్ళలో ఇలాంటివి ఒప్పుకోరు. వాళ్ళకు ఇష్టం ఉండదు. ఎవరా పిల్లా? సిగ్గు లేదానో, అంత బరితెగించిందా అనో అడిగి ఉంటారు.” చాలా మామూలు విషయంలా నవ్వేసింది నందిని.
[spacer height=”20px”]
సుధీర్ మాట్లాడలేదు. ఈ అమ్మాయి చాలా తెలివైంది. ఈమెతో మాట్లాడి నెగ్గటం కష్టం.
“గుడ్ నైట్” చెప్పేసి, తన గదిలోకి వెళ్ళిపోయింది నందిని.
* * * * * * * *
-టి.వి.యస్.రామానుజ రావు
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
