“ పొడిచే పొద్దు”లో కతలన్నీ కరిగిన వేళ

రచయిత్రిగా ఇప్పటి వరకు వందకు పైగా కథలు , అనేక వ్యాసాలూ రాసిన కన్నెగంటి అనసూయ . ఇప్పటి కాలంలో విరివిరిగా రచనలు చేస్తున్న రచయిత్రి . రెండు కథా సంపుటాలు , బాలల కథా సంపుటి , మరొక కథా సంపుటి ప్రచురణలో ఉన్నాయి . సాహిత్యంతో పాటు సేవా కార్యక్రమాలలో పాల్గొంటున్న రచయిత్రి ఆమె .

“ పొడిచే పొద్దు” ఆమె రెండవ కథా సంపుటి . ఈ కథా సంపుటిలో మొత్తం 13 కథలున్నాయి . మొదటి కథ “ పొడిచే పొద్దు “ లో సుబ్బు పాత్ర చుట్టూనే కథ నడుస్తుంది . వాడి వయసుకి పుస్తకాలతో బడికి వెళ్లవలిసిన వాడు , తెల్లవారక ముందే భుజాన సంచి వేసుకుని కూరగాయలు ఏరుకుని , వాటిని అమ్మి వచ్చే డబ్బుతో అక్క జబ్బు నయం చేయించాలని ఆరాట పడుతుంటాడు . కూరగాయలను చవకగా తీసుకుని వాడి కష్టాన్ని దోచుకుంటుంది పోశవ్వ . మరి సుబ్బు పోశవ్వ బారి నుండి తప్పించుకోగలిగాడ , తన అక్క జబ్బును నయం చేయగలిగాడ అనేది కథ చదివి తెసుకుకోవాల్సిందే . సుబ్బు పాత్ర బడుగు వర్గాల జీవితానికి ప్రతీకగా కన్పిస్తుంది .

మధ్యతరగతి కుటుంబాలలో భార్యాభర్తలు ఇద్దరు కష్టపడితే కాని సంసారం నడవని రోజులివి . ఇల్లును చక్కదిద్దుకుంటూ , బయట వ్యాపారం చేసే గృహిణి గౌరీ . ఆమె డబ్బుతో జల్సా చేసే భర్త , తనకి సహాయం చేయడానికి మాత్రం నామోసిగా భావిస్తాడు . కొద్దిపాటి వ్యత్యాసం ఉన్న పని మనిషి లక్ష్మిదీ కూడా ఇదే సమస్య . లక్ష్మి చూపిన చొరవ కూడా గౌరీ చేయలేకపోతుంది . చివరకి విసిగిపోయిన గౌరీ ఏ లాంటి “ నిర్ణయం “ తీసుకుందో అనేదే ఈ కథ ఇతివృత్తం .విశ్వం ,పార్వతి భార్యాభర్తలు . చేతనైనంతలో ఇతరులకు సాయం చేసే మనస్తత్వం పార్వతిది . మన దారి మనది . ఎవరు ఏమైపోయినా పర్వాలేదు అనుకునే వ్యక్తిత్వం విశ్వానిది . పైగా భార్య కి కొన్ని హద్దులు ఉండాలి అనే ఆలోచన ధోరణి కలావాడు కూడా. భార్య చేసే చిన్ని చిన్ని సహాయాలను భూతద్దంలో ఆలోచిస్తూ భార్యకీ , తనకి కూడా మనశ్శాంతి లేకుండా చేసుకుంటున్న విశ్వంతో ఎలా జీవించాలో అనేది పార్వతి” కర్తవ్యం”గా మారుతుంది . అది ఏమిటో అనేదే ఈ కథలో ని విషయం .

“ మార్పు మంచిదే కాని ” కథలో ప్రభుత్వ కార్యాలయాల్లో పని చేసే ఎంతో మంది ఉద్యోగులకి సాక్ష్యంగా నిలుస్తాడు భుజంగం . స్వార్ధం , అవినీతితో నిండిపోయిన రాజకీయ నేతల మనస్తత్వాలకు ఈ కథ అడ్డం పడుతుంది . ప్రభుత్వ ఉద్యోగిగా ఉన్న భుజంగం , తరవాత రాజకీయ నాయకుడిగా మారాలనుకోవడానికి కారణం ఏమిటి ? దాని కోసం భుజంగం ఎలాంటి ప్రయత్నాలు మొదలు పెట్టాడు . చివరకి తన కోరిక నెరవేరిందా లేదా అన్నది కథ చదివి తెలుసుకోవాల్సిందే . బయట మనకు నిత్యం కూరగాయల బజార్లులో కన్పించే సంఘటనే అయినా ఆలోచింపజేసే విధంగా కథనం సాగుతుంది . విజయ , కరుణల మధ్య సాగే ఈ సంభాషణల్లోకి సుదీర్ రావాడానికి కారణం ఏమిటి ? “ ఎదుటి వాళ్ల గురించి కూడా కొంచెం” అన్నది ఎవరికి వర్తిస్తుంది అనేదే కథ . అలాగే సమాజంలో నిత్యం జరుగుతున్న సమస్యలకు , కన్పిస్తున్న హృదయ విదారక దృశ్యాల సమాహారమే ” చిక్కుముడి “ .

తన వైపు నుంచి మాత్రమే ఆలోచించి , అసలు జరిగిన విషయం ఏమిటి అనేదానిని తెలుసుకోవాలి అనే ప్రయత్నం కూడా చేయని సగటు మనిషి కథే “ నిజాయితీ “ . ఆలస్యంగా తెలుసుకున్న ఆ తప్పుని సరిద్దుకునే అతి కొద్ది మంది మనుషులకి నీరజ పాత్ర ఆదర్శంగా నిలుస్తుంది . అసలు జరిగిన కథ ఏమిటో . నిజాయితిలో ఏం తెలిందో కథ చదవాల్సిందే .

మధ్యతరగతి బ్రతుకుల్లో కనిపించే తాగుడు . దానికి బానిసై వారి బ్రతుకుల్నే కాదు , కుటుంబాన్ని కూడా ఏవిధంగా కష్టాలపాలు చేస్తున్నారో “కతలన్నికరిగిన వేళలో” …. చెబుతాయి . అలాంటి ఇళ్ళల్లో స్త్రీలు పడే మనో వేదన , అవస్థలకు , కుటుంబాన్ని పోషిం చుకోవదాని పడే పాట్లుకు రంగి పాత్రే ప్రత్యక్ష సాక్ష్యంగా నిలుస్తుంది . చిన్నపిల్లలకి ఇంట్లో సరదాగా అలవాటైన చిన్ని చిన్ని విషయాలు , వాళ్లని బడిలో చేరాక అవి ఎలాంటి ప్రభావాన్ని చూపిస్తాయి అనేది బంధం కథలోని ఇతివృత్తం . అలాగే ఇంట్లో పెద్ద వాళ్లు ఉంటే ఏ విధంగా ఉంటుంది . అమ్మమ్మ , నాయనమ్మల ఆప్యాయతలు , వారి ప్రేమలు , వాళ్ల పనుల తాలుకు అర్ధాలు శీతాంశుముఖి , కనిపించే దేవుడు కథలో మనసును తాకుతాయి . వీధి బాలల దైన్య స్థితి , వాళ్లు పడే అవస్థాల్ని చెప్పడం వర్ణనాతీతం . అటువంటి వాటికి మరొక అనాధ పిల్లలే చేయూత , అండ అనేది కనుచూపు మేర కథ నిజం చేస్తుంది .

ఈ సంపుటిలో చిన్న పిల్లల మనస్తత్వాలకి , వాళ్ల చుట్టూ నడిచే కథలున్నాయి . మొదటి కథ “ పొడిచే పొద్దు “ లో ‘సుబ్బు’ జీవన స్థితి . కనిపించే దేవుడు కథలో ’బుల్లి’ అయినా , కనుచూపు మేరలో ‘పోరిగాడు’ , బంధంలో ‘సాకేత్’ భిన్న కోణాల్లో చిన్న పిల్లల పరిస్థితుల్ని , వాళ్ల పెరుగుతున్న ఆర్ధిక ,సాంఘిక వ్యత్యాసాలను విభిన్నంగా ఆవిష్కరించారు . సంపుటిలోని కథలన్నీ మనకు ప్రతి నిత్యం ఎదురయ్యే సంఘటనల సమాహారమే. ఈ కథలను బట్టి రచయిత్రి సమాజంపై గల దృష్టి , పరిశీలన ఎటువంటివో తెలుస్తాయి .

– అరసి

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~