జహానుమా గల్లీ నంబర్‌ దో

‘‘దుబయ్‌ల మస్తు జాయ్‌దాద్‌ ఉన్నది. నీ బేటీ సుఖపడ్తది లక్ష ఇస్తనంటున్నడు. ఒక మహీన అయినంక తను దుబయ్‌ పోయి పిల్లను పిలిపించుకుంటడు. ఫికరు చెయ్యకు ఆయెనకు బీవీ లేదు చచ్చిపోయింది. పది, పన్నెండేళ్ళ పోరగాళ్ళిద్దరున్నరు గంతే, ఇంగ నీ ఇష్టం’’ ఖాజీ సులేమాన్‌ ఫాతిమాబేగం ఇచ్చిన చాయ్‌ బిస్కట్ల మజా అనుభవిస్తా చెప్తున్నడు. మద్దెమద్దెల ఫాతిమా బేగం మొకంల ఒక్కసారిగ వచ్చి పోతున్న వెలుగును జూస్త ఇంక రిష్తా పక్కా అయినట్లేనని లోపట లోపట ఖుషీ అయితున్నడు. అవ్‌ మరి! ఈ రిష్తా గిన పక్కా అయితే నలభై వెయిలు తన చేతిల పడవు మల్ల?

‘‘అంత సయే గని పిలగాని ఉమర్‌ జర ఎక్కువ లేదు సులేమాన్‌ సాబ్‌?’’ ఫాతిమాబేగం గునుక్కుంట తన షొహర్‌.. మతీన్‌కై ఉరుముత జూస్త కండ్లతోని సైగ చేసింది మాట్లాడవేంది అన్నట్లు.’’ హా సులేమాన్‌ సాబ్‌, యాభై ఐద్దంక ఉందంట గద.. ఆ షేక్‌ ఉమర్‌.. మా యాస్మిన్‌ బానుకి పద్దెనిమిదేండ్లే గద! అన్నడు మతీన్‌ గూడ.

ఖాజీ సులేమాన్‌ ఉరిమి చూసిండు ‘‘అరే నీ బేటీ ఏమన్నా దూద్‌ పీతా బచ్చీనా ఏందీ? ఆల్లకు లక్షల జాయిదాద్‌ ఉన్నది.

ఇప్పుడిచ్చే లక్ష కాకుంట ఇంకింత ` ఇంకింత పంపుతనే ఉంటరు తియ్యు. నీకింకా నిఖాలు కావల్సిన ముగ్గురు జవాన్‌ బేటీలు ` బడికి పోతాన్న బేటా ఉన్నడు.. యాది మర్శినవా? నీ బేటా గూడా నీ తీరే ‘హరేక్‌ మాల్‌’ అన్కుంట గల్లీ గల్లీ బిచ్చపోని తీరంగ ఎండల వానల ఒర్లుత తిరగాల్నని ఉన్నద నీకు? ఈ దుబయ్‌ షేకు గూడంగ నీ బేటాను ఆడకు పిలిపించుకుని ఏదన్న కొల్వుల పెడ్తన్నడు. ఇంగ నీ మర్దీ.. నీ బీవీ మర్దీ..’’ అన్నడు ఖాజీ ఒర్లుతున్నట్లే. అన్నీ అబద్దాలే దుబయ్‌ షేక్‌ అట్లేమనలే గని ఎక్కడ తన ఆమ్దానీ పోతదో అన్న తొందరతోని అబద్దాలు`సుబద్దాలు చెప్తుండు ఖాజీ’’. ‘‘జల్ది చెప్పాలె. ఇంక రెండు రిష్తాలున్నయ్‌, నా చేతిల ఆల్లు సుగ నా ఎంట బడ్తాన్రు. గని షేక్‌ నీ బిడ్డ మీన మనసు పడ్డడు ఎర్రంగ`బుర్రంగ ఉన్నదని. కల్‌తక్‌ బోల్‌దేనా హై.. బస్‌! చల్తాహూ’’ అన్కుంట లేశిండు ఖాజీ సులేమాన్‌. అవి గూడ అబద్దాలె.. ఖాజీల పోటీ ఎక్కువైంది పాతబస్తీల. దాంతోని నెలకు ఒకటో, రెండో కేసులు తగుల్తున్నయ్‌ సులేమాన్‌కు.

                            ***                                                    ***                                                        ***

‘‘ఒక మహీన కోసానకు ఈ పక్కనున్న కమ్రగూడ కిరాయికి తీస్కుందం, ఏం జేస్తం మరి?’’ అన్నడు మతీన్‌. వాల్లకున్నవే రెండు చిన్న కమ్రలు అన్లనే అంత పెద్ద సంసారం. ముగ్గురు ఔరత్‌బచ్చీలు పాత బస్తీల తల్లితోని ఎంబ్రాయిడరీ పనికి పోతున్నరు గని ఆ నల్గురి ఆమ్‌దారీ నెలకు మూడు వెయిలు గూడ దాటది. ఈ మధ్యల ఫాతీమా బేగంకు కడుపుల పుండచ్చి ఆప్రేషన్‌ చేసిన్రు.. ఇగ అప్పటిసంది ఆమె పనికి పోవుడు బందు చేసింది. కొడుకు ఇంకా చదువుతున్నడు వాని పది అయినంక… ఎలక్ట్రీషియన్‌ కోర్సుల చేర్పించి దుబయ్‌ పంపాల్నని మతీన్‌ ఖ్వాయిష్‌. ఆడ ఈ పన్లకు మస్తు గిరాకీ ఉన్నదంట. ఇంక మతీన్‌ పొద్దుగల్లే హైద్రాబాద్‌ ` సికింద్రాబాద్‌ గల్లీలల్ల ` హరేక్‌మాల్‌ బండి మీద బతుకుతున్నడు. దానిమీద ఏమంత రాదుగని, ఏదో నడుస్తాంది జిందగీ. ఇప్పటికైనా ఆ దుబయ్‌ షేక్‌ ఇచ్చే లక్షతోని ఇద్దరు బేటీల నిఖాలు చేసుడో లేకపోతే కొడుకు జహంగీర్‌ను దుబయ్‌కు పంపుడో ఏదో చెయ్యాల.. మతీన్‌ కలల్ల తేలిపోతున్నడు

ఫాతీమా బేగం గూడ మస్తు ఖుషీగుంది యాస్మిన్‌ మొదట్ల, మొదట్ల జర్రంత జిద్దు చేసిన గని తర్వాత అమ్మీ`బావల కన్నీల్లు ` ఆల్ల పైసల అవసరాలు చూసి ఒప్పుకున్నది. మీదికెల్లి వచ్చే యాడాది బడీ బహెన్‌ తన తర్వాతది.. దాని నిఖా చేద్దమనుకున్నరు. తన నిఖా అయిపోతే ఇంక నుస్రత్‌ నిఖా గురించి ఆలోశెన చెయ్యచ్చు. ఆల్లకు చాల జాయిదాద్‌ ఉన్నదంట. రెండు మూడు బంగ్లలు ఉన్నయంట. మీదికెల్లి జహంగీర్‌ భాయ్‌కి గూడంగ దుబయ్‌ల నౌఖరీ ఇప్పిస్తున్నడంట. బడీ బెహెన్‌ నుస్రత్‌ బాను నిఖా గూడ ఏదన్న దుబయ్‌ రిష్తా తెద్దమని ప్లాను అమ్మీ బావాలకు. తనొక్కతి దుబయ్‌కెల్లిపోతే ఇగ బావా దిన్‌రాత్‌ గల్లీ గల్లీ హరేక్‌మాల్‌ అని గల్లా నరాలు తెగేటట్లు ఆరుసుడు బందువెట్టి, హాయిగ నవాబు తీరంగ ఇంటికాణ్ణే ఉన్న గల్లీల సంత దుకాన్‌ పెట్టుకోని ఆరాంగ కూసోవచ్చు. అమ్మీ గూడంగ… ఏదన్న అమ్ముకుంట చేరచ్చు అన్లనే కూసుని. ఇగ సెల్లెండ్లలో నుస్రత్‌భాను నిఖా ఎట్లయిన తను దుబయ్‌ పోయినంక తన షొహర్‌కు చెప్పి మంచి రిష్తా చూసి ` అగ్‌లీ సాల్‌ చేసేసుడే! అప్పన్దంక ఎంబ్రాయిడరీ దుక్నంలనే చేస్కుంటరు తియ్యు! లేకపోతే బావా కమాయి మంచి గుంటే… ఆరాంగ ఇంటికాణ్ణె వుంటరు నుస్రత్‌బాను, భాయ్‌. అమ్మీ బావాలను గూడ దుబయ్‌ పిలిపించుకుంటరు. అందరం ఇంక ఆడ్నే వుంటం. ఇన్ని తీర్ల ఆలోచిస్తాంది యాస్మిన్‌బాను. యాభై ఐదేళ్ళ షేకు.. వయసు ములుకు. తీరు గుచ్చుతున్న గని, ఇన్ని పనులు తనొక్క నిఖాతోని అయ్యి తమామ్‌ ఇంటోల్లు ఖుషీతోని ఉంటరని మనసుని సమ్జాయిస్తున్నది.. బార్‌.. బార్‌! నిన్ననే పక్కింట్ల ఉండే అజ్మత్‌ బేగం ఆంటీ ‘‘ఎందుకు యాస్మిన్‌ పోయి పోయి ముసలోడ్ని చేస్కుంటున్నవు? మీ అమ్మీ బావాల భేజీ ఖరాబైతే… నీ భేజాకేం అయ్యిందే? ఒద్దు చాలా మోసాలు జరుగుతున్నయ్‌ ఈ సౌదీ నిఖాల పేర్లతోని.. నక్కోమా నక్కో కరో ఏ షాదీ’’ అన్కుంట మస్తు చెప్పింది. అమ్మీ మాత్రం ‘‘జల్తీ హై వో.. దాని బేటీ గూడ నిఖాకి ఉంది గద? మీదికెల్లి నిన్ననే నీకాబోయే షొహర్‌ నీకు ఆరు సావరిన్‌ల సోనేకే గప్‌ానే పంపిండుగద? అవ్వి చూసి కండ్లు కుట్టినయ్‌ దాని తానకు పోకు.. నీకు దాని దిష్టి తగుల్తది… బురీ నజర్‌ హై ఉస్‌కీ..’’ అన్కుంట ఇన్ని ఎండు మిరపకాయల దిష్టి తీసింది యాస్మిన్‌కు ఫాతీమాబేగం. అంత బంగారం ఆల్లెవరూ జిందగీల చూడలె మరి.

మతీన్‌ పక్కల్నె ఉన్న కమ్ర గూడ కిరాయకు తీస్కున్నడు నిఖా పక్కా అయ్యింది. ఇంటికి సున్నాలేసిన్రు. రిష్తేదార్‌లందర్ని గల్లీల జాన్‌పహ్ చానత్‌ ఉన్నోలందర్కి చెప్పిన్రు. షాదీ ఖానా మాట్లాడుకున్నరు. షేక్‌ బట్టలు కొనుక్కోమని మతీన్‌కు ఇరవై వెయిలు ఇచ్చిండు. మతీన్‌ అందర్కి అన్లనే బట్టలు కొన్నడు. దుల్హాకు కుర్తా పైజామా కొన్నడు అంత సంబరంగున్నరు. ఇల్లంత రిష్తేదార్లతోని నిండిపొయ్యింది. షేక్‌ ప్రింటు చేసిచ్చిన షాదీరుఖాలు ముఖ్యమైన రిష్తేదార్లకు గొప్పగ పంపిన్రు. చూస్త చూస్తనే షేకిచ్చిన లక్ష రూపాయలల్ల నలభై వెయిలు పోయినయ్‌ నిఖాకు ముంగట్నె. ఇంక నిఖా తర్వాత దావత్ల ఘోష్‌ కా సాలన్‌, బిర్యానీ లేకుంటే ఊకుంటర? ఇంట్ల జరిగే మొదటి నిఖా… మతీన్‌కు దిగులేశింది. నిఖా తేదీ వచ్చేసింది.

యాస్మిన్‌బాను కుబూల్‌ హై ` కుబూల్‌ హైల మధ్య ధగ ధగ మెరుస్తున్న మెరుపు మెరుపుల బట్టలు, బంగారు జెవెరాత్ల మధ్య ఎవ్వలకు దుల్హా యాభై ఐదు ఏండ్ల ముసలితనం కనిపించలె.

‘‘అమ్మీ, డర్‌ లగ్‌తా హై.. ఉన్‌కే పాస్‌ నై జావూంగీ…’’ అమ్మీని కర్సుకుని ఏడుస్తున్నది ` ఒనుక్కుంట… పద్దెన్మిదేండ్లు గూడ నిండని పసిమొగ్గ యాస్మిన్‌. భయమేస్తున్నది షొహర్‌ తానకు పోనని జిద్దు చేస్తున్నది’’. ‘‘నై బేటీ షాదీ కే బాద్‌ షొహర్‌కే పాస్‌ హీ సోనా హై’’ (పెండ్లయినంక మొగనితాననే పండాలె బిడ్డా) అంటున్నది, ఫాతీమాబేగం బుదరకిస్త, యాస్మిన్‌ తలల మల్లెపూలు గుచ్చుతున్నది. యాస్మిన్‌ ఆ రాత్రి షేక్‌ కమ్రలకు పోనని మస్తేడ్సింది. పది రోజుల షేక్‌ రాక్షస రతిల ఆ పసిమొగ్గ చితికిపొయ్యింది. చానా గలీజు పనులు చేస్తడు ` చానా నొప్పైతుంది. నన్నాయన తానకు పంపకు అమ్మీ’’ అన్కుంట యాస్మిన్‌ ప్రతిరోజూ ఏడ్సుడు, ఫాతీమా బేగం నవ్వుత కొట్టిపడేసుడు. ఆ నరకకూపమసుంటి కమ్రలకు పంపుడు. పులిబోనుల బడ్డ పావురాయి లెక్క యాస్మిన్‌ హర్‌ రాత్‌ బలైపోవుడు మామూలైపోయింది.

                                   ***                                                      ***                                                      ***

నెల దినాలల్ల యాస్మిన్‌ బానుని దుబయ్‌ పిలిపించుకుంటనని షేక్‌ దుబయ్‌ ఎల్లిపోయిన సంది, యాస్మిన్‌ ఆరాంగున్నది. జిందగీల ఆయిన తానకు పోనని మస్తు సార్లనుకున్నది. జెవరాత్‌లు ` కొత్త చెమ్కీ చెమ్కీ బట్టలు, అత్తర్లు, మల్లెపూలు, నయీదుల్హన్‌ ముబారక్‌ బాత్‌లు ` రిష్తేదార్‌ల మురిపాలు అన్నీ మంచిగున్నయ్‌ గని, రాత్రపూట ఆ షేక్‌ చేసే పనులె ఒణుకు పుట్టిస్తున్నయ్‌. మీద వడ్తె సాస్‌ ఆడక హోష్‌ పోయినట్లే అయితది. దిన్‌ రాత్‌… రెండు, మూడుసార్లు సతాయిస్తడు. ఒల్లంత అతని పంటిరక్కులె.. ఎంతగనం ఏడ్చిందని? పప్‌ాలీ రాత్‌ తలుపులు దబ్బ దబ్బ బాదింది ఒనుకుత.. ఏడుస్త.. అమ్మీ దర్వాజ ఖోలో అనుకుంట.. అమ్మీ రాలె.. బావా రాలె. ఆ ఖుదా గూడ రక్షించలె. ఈ షేక్‌ పప్‌ాలీ బీవీ ఇగో చేస్తనే సచ్చిపోయి వుంటది. హర్‌గీజ్‌ నహీ జానా ఉన్‌కే పాస్‌. ఖచ్చితంగ అనుకున్నది. యాస్మిన్‌ వందోసారి ‘నైజాతుం’ అని అమ్మీ బావాలకు గూడ చెప్పింది.

యాస్మిన్‌కు వీసా వచ్చింది, ఆమె గుండె పగిలినట్లైంది. ‘‘ఆపా హవాయీ జహాజ్‌ల ఎగురుకుంట పోతదా అమ్మీ’’ అన్కుంట సఫియాబాను సంబరంగ అడుగుతున్నది, ఫాతిమాబేగంను. అంత తమ బేటీ ఖుష్‌ నసీబ్‌ అనుకున్నరు ఫాతీమా`మతీన్‌లు. యాస్మిన్‌ దుబయ్‌ కెల్లినంక అగ్‌లే సాల్‌ దర్గాకొస్తమని న్యాజ్‌ తీస్కున్నరు.

ఏడుస్త`ఏడుస్తనే హవాయి జహాజ్‌ల దుబయ్‌ పయనమయ్యింది యాస్మిన్‌ బాను.. పోతున్న హవాయి జహాజ్‌లకెల్లి దుంకెయ్యాలని గూడ అన్పించింది యాస్మిన్‌కు.

దుబయ్‌ల షేక్‌ ఇల్లు చూసి మస్తు తాజూబ్‌ అయ్యింది, పరేషానైపోయింది. సిన్మలల్ల చూసింది అసుంటి మహల్‌ను. ఇల్లంత నౌఖర్లె. నాలుగు దినాలు షేక్‌ మంచిగనే చూస్కున్నడు రాత్రి పూట నరకం ఎట్లైన తప్పలేదు. అంత పెద్ద ఇంటికి.. తనొక్కతేనా? తమ ఈ ఇంటికి బేగంసాహిబా అన్కుంట తాజూబైంది యాస్మిన్‌. గానీ, వారం దినాలైనంక ఇంట్లకెవలో కొత్తోల్లు ఆడోల్లు, మగోల్లు వచ్చి చేరిన్రు. నౌఖరానీ`ఖలీదా చెప్పిన సంగతి ఇనుకుంట పరేషానైపోయింది యాస్మిన్‌ బాను.