అక్షరాలు దిద్దించిన చేతులను 

కాళ్ళు మొక్కమంది విద్యార్థి పైత్యం 

అబద్ధం చక్కర్లు కొట్టింది 

సోషల్ మీడియా వెర్రి తలలేసి 

భిక్షాటన తో కొవ్వెక్కి 

ఉపాధ్యాయుడి ని దోషి ని చేసింది 

నల్లబట్టల్లో దాచుకున్న సనాతనం 

ఉరిమింది 

క్రమశిక్షణ నేర్పిన గురువు నే 

మోకరిల్లమంది 

సంఘాన్ని రాజ్యం శాసించక పోతే 

పెట్రేగే మూకలు 

పెచ్చరిల్లిపోతాయి 

అది ఏ మతమైనా 

పాఠశాలలోకి మూకుమ్మడి ప్రవేశం సహించరానిది 

భౌతిక దాడికి తెగబడిన నల్లగుడ్డలోళ్ల నియమాలివేనా?!

ఉపాధ్యాయుడంటే 

రెండు చేతులు జోడించమని చెప్పడు 

ప్రశ్నను ఆశిస్తాడు 

జవాబు చెబుతాడు 

అదే సమాజాన్ని ప్రశ్నించ మంటాడు 

జవాబులో హేతువు ను చూడమంటాడు!

ఎవడెట్టా పుట్టాడో ఎరుగని సంత 

ఎగేసుకుని తిరుగుతుంది 

ఊరు మీద ఒదిలిన ఆంబోతులల్లే 

నినాదాల రంకెలతో హోరు 

అక్షరం ముక్క లేని ఛాందసుల ఏలుబడి లో 

ఇంకెన్ని ఘోరాలో 

తన తలుపు తట్టే దాకా బజ్జుండే 

చాంతాడంత మనుషుల జాబితా మీద 

నల్ల సిరా బోయ!!

– గిరి ప్రసాద్ చెలమల్లు 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~