చదువులు ఉద్యోగాలు బాధ్యతలతో
చిరాకుపడే అతని నిస్సారమైన జీవితంలో
ఓ సినీతార దర్శనమిచ్చింది
ఆమె సౌందర్యం
అతని గుండెలపై భారమయ్యింది
ఆమె సోయగం
అతని ఊహలకి మధ్యబిందువయ్యింది
అతడామెని ఆరాధించాడు
సుఖంలో అలసి సుషుప్తి చెందాడు
***
మెలకువ వచ్చి చూసేసరికి
అతని చుట్టూ సమాజం,గౌరవం
వార్దక్యపు వేదికను కట్టి ఉంచాయి
ఇప్పుడు ఆమెనే సంప్రదాయమనే మైకులో
ఛీకొట్టాడు లీలగా గుర్తొస్తే లెంపలేసుకున్నాడు
వెరసి ఒకానొక రోజున
ఆ తార మరలా తారసపడింది
ఆమె అభినయంలో
శృంగారం కాదు వెటకారం కనబడింది
అతను భావచిత్రంలో
ఆమెని ముక్కలుగా చింపి పారేసి వెళ్ళిపోయాడు
:
:
ఐతే
ముక్కలన్నీ
కాలాన్ని ఓ ప్రశ్నవేశాయి
తేడా ఆమె నటన లో ఉందా?
లేక అతని నయనంలో ఉందా??
– కళాథర్ పరుచూరు
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~