“ ప్రేంఖనీ నాట్యాన్ని” తన శిష్యులతో దేశ విదేశాల్లో ఎన్నో ప్రదర్శనలు ఇస్తున్న “కళారత్న” ఓలేటి రంగమమణి గారితో ఈ నెల నర్తన కేళి ముఖాముఖి ……..
*నమస్కారం అమ్మా ?
నమస్కారం . రండి రండి , కూర్చోండి .
*మీ కుటుంబ నేపథ్యం గురించి చెప్పండి ?
మా నాన్న పేరు సి .ఆర్.ఆచార్య ,కూచిపూడి లోని నూజివీడు వారి గ్రామం స్వస్థలం .
*తొలి గురువు ?
నా తొలి గురువు మా నాన్న గారే .
*ఇంకా ఎవరి వద్ద నాట్యాన్ని అభ్యసించారు ?
మా నాన్నగారు అహ్మదాబాద్ లో ఉన్నప్పుడు కొంత కాలం వేదాంతం ప్రహ్లాద శర్మ గారి వద్ద నేర్చుకున్నాను .
*మీ తొలి ప్రదర్శన ?
నేను చిన్న పిల్లగా ఉన్నప్పుడే తొలి ప్రదర్శన చేసాను . నాకు అంతగా గుర్తులేదు కాని ఆ ప్రదర్శన ఏలూరులో ఒకసారి కూచిపూడి శిక్షణ ఏర్పాటు చేసినప్పుడు . ఆ శిక్షణలో భాగంగాజరిగిన ప్రదర్శనలో చేసానంట.
*మీ నాన్నగారు రూపొందించిన “ ప్రేంఖనీ నాట్యం” గురించి చెప్పండి ?
ముగ్గును వేదికపై పోసి దానిపై వస్త్రాన్ని పరచి , జతులు , తాళాలకు అనుగుణంగా నర్తకీ కదులుతూ ఆ వస్త్రంపై చిత్రాన్ని గీయడం జరుగుతుంది . దీనినే ప్రేంఖనీ నాట్యం అంటారు .
*ఈ ప్రేంఖనీ నాట్యన్ని ఎన్ని విధాలుగా చేయవచ్చు ?
సింహనందిని , మయూర కౌత్వం ,గణేశ కౌత్వం , మహాలక్ష్మి మొదలైన నృత్యాంశాలను తీసుకుని కూడా చేస్తారు .
*మీ నృత్య శిక్షణ సంస్థ పేరు ?
అభినయ దర్పణ – ఆర్ట్ అకాడమి . 1980 లో ప్రారంభించాను . మూడు చోట్ల పిల్లలకు శిక్షణ ఇస్తున్నాను .
*ఇప్పటి వరకు ఎన్ని ప్రదర్శనలు ఇచ్చారు ?
చాలా ప్రదర్శనలు ఇచ్చాము . దేశ విదేశాల్లో కొన్ని వేల ప్రదర్శనలు మా నృత్య అకాడమి ద్వారా చేసాము .
*మీరు చేసిన నృత్య రూపకాలు గురించి చెప్పండి ?
గజేంద్ర మోక్షం , గీతా సచ్చిదానంద , గోదా కళ్యాణం , కుమార సంభవం ,హరిత భారతి , సమైఖ్య భారతి , గోదా గీత మాలిక చేసాము .
*గజేంద్ర మోక్షం నృత్య రూపకం గురించి చెప్పండి ?
భాగవతం లోని గజేంద్ర మోక్షం ఘట్టాన్ని తీసుకుని చేసినదే గజేంద్ర మోక్షం . శాస్త్రి గారు సంగీతం సమకూర్చారు . రెండు గంటలు నిడివితో ప్రదర్శన ఇచ్చాము .
*మీరు చేసిన గోదాదేవి కళ్యాణం , గోదా గీతమాలిక రెండింటికి తేడా ఏమిటి ?
గోదా కళ్యాణం లో గోదాదేవి , శ్రీరంగనాధుల కళ్యాణం ప్రధానంగా తీసుకుని చేసాము . గోదా గీతమాలికలో తిరుప్పావై కి సంబంధించి అంశాన్ని పాటల రూపంలో పొందు పరిచి చేసినది .
*హరిత భారతి “ నృత్య రూపకం గురించి చెప్పండి ?
పర్యావరణం గురించి చెప్పాలనే ఈ బ్యాలే చేసాను . కాలుష్యం వలన కలిగే నష్టాలను తెలియజేయాలి , మరే ముఖ్యంగా గాలి కాలుష్యం గురించి , దాని వలన కలుగుతున్న అనార్ధాలను ప్రజలకు తెలియజేయడమే ఈ హరిత భారతి నృత్య రూపకాన్ని చేసాము .
*సమైఖ్య భారతి “ నృత్య రూపకంలో తీసుకున్న అంశం ఏమిటి ?
భారత దేశం అనేక జాతుల కలయిక . భిన్నత్వంలో ఏకత్వం కలిగినది మన దేశం . ఆ సూత్రాన్ని ఆధారంగా చేసుకుని అన్ని జాతుల వారు కలిసిమెలిసి ఉండాలని , అదే దేశానికి మేలని చాటి చెప్పేదే సమైఖ్య భారతి .
*గీతా సచ్చిదానందం నృత్య రూపకం గురించి చెప్పండి ?
గణపతి సచ్చి దానందం స్వామి మైసూర్ లో ఉంటారు . వారి జీవిత చరిత్రని తీసుకుని , పుట్టుక నుండి ప్రస్తుతం వరకు జరిగిన వాటిలో కొన్ని ముఖ్య ఘట్టాలతో రూపొందించినదే గీతా సచ్చిదానందం . తోలో ప్రదర్శన మైసూరులో చేసాము . తర్వాత పలు చోట్ల ప్రదర్శనలు ఇచ్చాము .
*మీరు నిర్వహించిన వర్క్ షాప్ గురించి చెప్పండి ?
1999 – 2001 మధ్యలో టొరంటో (కెనడా )లో సుమతీరావు గారి కోరికపై అక్కడ వర్క్ షాప్ నిర్వహించాను . మంచి స్పందన వచ్చింది . చివర్లో వారందరి చేత ప్రదర్శన కూడా చేయించాను .
*మీరు అందుకున్న పురస్కారాలు గురించి ?
20 13 లో కళారత్న – ఆంద్ర ప్రదేశ్ ప్రభుత్వం ,2003 లో ఉమెన్ ఆఫ్ ది ఇయర్ , k.v.s – 2 0 0 8 అవార్డు – k.v.s ట్రస్ట్ నుంచి ,
*ప్రస్తుతం చేస్తున్న ప్రాజెక్ట్ ఏమిటి ?
డిపార్టమెంట్ కల్చరర్ వారు నుంచి ఒక ప్రాజెక్ట్ చేస్తున్నాను . అది మా నాన్న గారు జీవిత చరిత్ర రాయడం . దాదాపుగా పూర్తి కావచ్చింది .
*ఇప్పుడు శాస్త్రీయ నృత్యాన్ని అభ్యసించే వారికి మీరిచ్చే సలహా , సూచన ?
ఎంతో శ్రద్ధాగా నేర్చుకునే ప్రయత్నం చేయండి . ఏదో ఒకటి ,రెండు ప్రదర్శనలకు చేస్తే చాలు అని కాకుండా మనస్ఫూర్తిగా అభ్యసించాలి .
మీ భావాలు , అనుభవాలు మాతో పంచుకున్నందుకు ధన్యవాదాలు.నమస్తే
– అరసి
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
